Thursday, July 10, 2008

ഒരു തൊഴിലന്വേഷണം

ഇനി ഇയാള്‍ക്ക് ജോലിക്ക് പോവാലോ?മോള് സ്കൂളില്‍ പോയി തുടങ്ങിയില്ലേ?വിജയന്‍ അങ്കിള്‍ന്‍റെ ആ ചോദ്യത്തില്‍ പിടിച്ചു ഞാനങ്ങ് കയറി.ഭര്‍ത്താവിനോട് പറഞ്ഞു," എനിക്കും ജോലിക്ക് പോണംന്നേ..വീട്ടിലിരുന്നു മടുത്തു.ഇനി,നാട്ടില്‍ തിരിച്ചെത്തി,എന്‍റെ പഴയ ജോലിയില്‍ എന്ന് ജോയിന്‍ ചെയ്യാനാ?" മൂപ്പര് പറഞ്ഞു,"നിനക്കു പിന്നെ വേഗം ജോലി കിട്ടും,ഡിമാന്ടസ് അത്ര കുറച്ചല്ലേ ഉള്ളൂ..ഉച്ചവരെയേ വര്‍കിംഗ് അവേര്സ് പാടുള്ളൂ,വെള്ളി,ശനി അവധി വേണം,ജോലിയില്ലേലും ശമ്പളം വേണം,അമ്മയെ കാണാന്‍ തോന്നുമ്പോ നാട്ടില്‍ പോണം,പറ്റുന്ന ദിവസമൊക്കെ ലീവ് എടുക്കണം,ബി.എഡ്. കഴിഞ്ഞ നിനക്കു ടീച്ചിംഗ് നോട്സ്‌ എഴുതാന്‍ പറ്റില്ല.അതുകൊണ്ട് ജോലി സ്കൂളില്‍ വേണ്ട.ഇത്രയൊക്കെയല്ലേ ഉള്ളൂ.."

"ഊം..ഊം..ഊം.. കളിയാക്കിയതാണ് അല്ലെ?വേണ്ട കേട്ടോ,പറ്റുമെങ്കില്‍ എനിക്ക് ഒരു ജോലി ശരിയാക്കി തരൂ. ഡിമാനട്സില്‍ ചില്ലറ മാറ്റങ്ങള്‍ വരുത്തിയിട്ടുണ്ട്.വര്‍കിംഗ് അവേര്സ് ഞാന്‍ നാലുമണി വരെ നീട്ടിയിട്ടുണ്ട്.മതിയോ?ഇവിടെ,ബന്ദും,ഹര്‍ത്താലും,കല്യാണവും,ചോരൂണും ഒന്നും ഇല്ലല്ലോ..അപ്പൊ,ഇടക്കൊക്കെ ലീവ് എടുത്തെന്ന് വരും.” ഞാന്‍ തിരിച്ചടിച്ചു.കണവന്‍ എന്നത്തേയും പോലെ രാഷ്ട്രീയക്കാരെ വെട്ടിക്കുന്ന വിധത്തിലുള്ള പലതരം വാഗ്ദാനങ്ങളും വിളിച്ചു പറഞ്ഞു.ഉറപ്പ്.ഒരുമാസത്തിനുള്ളില്‍ നിനക്കു ജോയിന്‍ ചെയ്യാം.എല്ലാം ശരിയാക്കിയിട്ടുണ്ടെന്നെ.മാസങ്ങള്‍ പിന്നിട്ടതല്ലാതെ,ജോലി പോയിട്ട് ഒരു കുന്തോം കിട്ടിയില്ല.


അങ്ങനെയിരിക്കെ,"ഹോണ്ടയില്‍ കൊടുത്ത ബയോഡാറ്റാ അവര്‍ ആക്സെപ്റ്റ് ചെയ്തു.ഈ നമ്പരില്‍ ഒന്നു വിളിക്കണം"...വിജയന്‍ അങ്കിള്‍ തന്നെ വിളിച്ചു പറഞ്ഞപ്പോള്‍,.പറഞ്ഞ നമ്പരില്‍ വിളിക്കുന്നു,ഇന്റര്‍വ്യൂ ഡേറ്റ് ഫിക്സ് ചെയ്യുന്നു. ഭര്‍ത്താവിനെ വിളിക്കുന്നു.സന്തോഷം പങ്കു വയ്ക്കുന്നു.ഉറങ്ങിക്കിടന്ന മോളെ വിളിച്ചു എണീപ്പിച്ചു സംഗതി പറയുന്നു. കണ്ണ് മിഴിച്ചു അവള്‍ ചോദിച്ചു,"ശരിക്കും ജോലി കിട്ടിയോ?".."ശ്ശ്ശെ..ഇവളെന്താ ഇങ്ങനെ?ബി,ഒപ്ടിമിസ്റിക്..അമ്മയ്ക്ക് ജോലിയൊക്കെ കിട്ടും,നാളെ ഇന്റര്‍വ്യൂ നു പോണുണ്ട്." ഞാന്‍ വച്ചു കാച്ചി."അത്രേള്ളൂ,വാവച്ചു ഉറക്കം മതിയായില്ല." അവള് ചന്തിയും പൊക്കി,വീണ്ടും കമഴ്ന്നു കിടന്നു ഉറങ്ങി.


അയല്‍വാസിയായ ഗീത ചേച്ചി പറഞ്ഞു,"നന്നായി ഒരുങ്ങി പോകണം കേട്ടോ"..ഇതു കേട്ടപ്പോള്‍,ഭര്‍ത്താവ് ചോദിച്ചു,"എടീ, ചക്ക പോത്തെ....നീയെന്താ ഡാന്‍സ് കോംപടീഷന്‍ ആണോ പോണേ?"....അല്ലെങ്കിലും,സ്വന്തം ഭാര്യയെ ചക്ക പോത്തെന്നു വിളിക്കുന്ന ഒരേ ഒരു മനുഷ്യന്‍ ഇങ്ങേരായിരിക്കും.എന്‍റെ അച്ഛാച്ചന്‍ അച്ഛന്മ്മയെ "അതേയ്,പിന്നെ ഒരു കാര്യം"..ഇങ്ങനെ വിളിക്കുന്നതെ കേട്ടിട്ടുള്ളൂ..,അച്ഛന്‍ അമ്മയെ,"കുട്ടീ" എന്നും...ഇങ്ങേരു ഇതൊക്കെ ഇനി എവിടെ ചെന്നു പഠിക്കാനാ?ഇതു കേട്ടതോടെ,പിറ്റേന്ന് ഇട്ടു പോകാന്‍ എടുത്തു വച്ചിരുന്ന ഡ്രസ്സ് തിരികെ അലമാരയില്‍ തന്നെ കുത്തികേറ്റി.. ഇന്റര്‍വ്യൂ നു പോകുന്ന വഴി മൂപ്പര് എന്നോട് ചോദിച്ചു,"നീ ഇന്റര്‍വ്യൂന് ചെന്നിട്ടു അവിടെ പോയി മുട്ടയിട്വോ?"..ഈശ്വരാ!! സ്വന്തം ഭാര്യയുടെ കഴിവില്‍ ഇത്രേം വിശ്വാസം ഇല്ലാത്ത ഒരു മനുഷ്യന്‍ !!! ഇങ്ങേരെയാണല്ലോ,ഞാന്‍ കല്യാണം കഴിച്ചത്? എനിക്കിതു തന്നെ വേണം. "പിന്നെ,ചിലപ്പോ മുട്ടയിട്ടെന്നു വരും.ഇട്ടാല്‍ ഞാന്‍ അത് തരാം.പുഴുങ്ങി തിന്നേക്കണം കേട്ടോ." പറ്റുന്ന ഭാഷയില്‍ ഞാന്‍ തിരിച്ചടിച്ചു."പേടിക്കാതെ എല്ലാത്തിനും ആന്‍സര്‍ ചെയ്‌താല്‍ മതി"...എന്നോടൊന്നു സോപ്പിട്ടു.



ഓഫീസ് തപ്പിപിടിച്ച് കൃത്യ സമയത്തു തന്നെ എത്തി.മൂന്നു പേര്‍ എന്നോടായി തലങ്ങും,വിലങ്ങും ചോദ്യ ശരങ്ങള്‍!ഇടയ്ക്കിടക്ക് അവര്‍ തന്നെ പറയുന്നു,"പ്ലീസ് ഡോണ്‍ട് കന്‍സിഡേര്‍ ദിസ് ആസ് ആന്‍ ഇന്റര്‍വ്യൂ.ദിസ് ഇസ് ഒണ്‍ലി എ പേര്‍സണല്‍ ടോക്"..ഊം.ഇതു പേര്‍സണല്‍ ടോക് ആണെന്കില്‍,ഇവര് ഉദ്ദേശിക്കുന്ന ഇന്റര്‍വ്യൂ എന്താ?ബയോഡാറ്റയിലെ എം.എ.ഹിസ്റ്ററി കണ്ടിട്ടാണെന്ന് തോന്നുന്നു,മുഗള്‍ ഹിസ്റ്ററിയെ പറ്റി ചോദിച്ചിരിക്കുന്നു.അക്കൌണ്ട് സെക്ഷനിലെ പോസ്റ്റിനു മുഗള്‍ ഹിസ്റ്ററിയും ആയിട്ട് എന്ത് ബന്ധം?ഞാനും വിട്ടു കൊടുത്തില്ല.ഭര്‍ത്താവ് പറഞ്ഞതു അക്ഷരം പ്രതി അനുസരിച്ചു.എല്ലാത്തിനും ഉത്തരം വച്ചു കാച്ചി.എന്‍റെ ഉത്തരം കേട്ടിട്ട് ഞാനൊരു "മിസ്സിസ്.സര്‍ദാര്‍ജി " ആണ് എന്ന് തോന്നിയോ,എന്തോ?


വിവരം അവര്‍ രണ്ടു ദിവസത്തിനുള്ളില്‍ അറിയിക്കാം എന്ന് പറഞ്ഞു.ഇതു കേട്ടപ്പോള്‍ തന്നെ ഭര്‍ത്താവ് പറഞ്ഞു,സെലക്റ്റ് ചെയ്യാന്‍ ഉദ്ദേശിക്കുന്നുന്ടെന്കില്‍ അവര് ഇപ്പോള്‍ തന്നെ പറയും.".."അതെയോ?ശോ! ഞാന്‍ വിചാരിച്ചു,സാരമില്ല,ദോഹയിലെ എന്‍റെ ആദ്യത്തെ ഇന്റര്‍വ്യൂ എന്ന് ഓര്‍മകളില്‍ സൂക്ഷിച്ചു വക്കാം" ഞാന്‍ മൊഴിഞ്ഞു.ദിവസം മൂന്നു-നാല് കഴിഞ്ഞു .ഹോണ്ടയില്‍ നിന്നു ഒരു വിവരവും ഇല്ല.പ്രതീക്ഷ കൈ വിട്ടപ്പോഴാണ് അവര്‍ വിളിച്ചു പറഞ്ഞതു, നാളെ വന്നു ജോയിന്‍ ചെയ്യൂ എന്ന്.സന്തോഷം കൊണ്ടു ഞാന്‍ പറന്നു,പറന്നു ആകാശത്ത് എത്തി.അവിടെ എത്തിയപ്പോഴാണ് ഓര്‍ത്തത്‌,ആരെയും വിളിച്ചു പറഞ്ഞില്ലെന്നു.പറന്നു തന്നെ താഴെ ലാന്‍ഡ് ചെയ്തു. ഭര്‍ത്താവിനെ വിളിച്ചു പറയുന്നു,ഓര്‍കുടില്‍ കയറി സ്ക്രാപ്പ് ഇടുന്നു - നാളെ തൊട്ടു ജോലിക്ക് പോകുന്നു,ഇനി പണ്ടത്തെ പോലെ സ്ക്രാപ്പ് ഒന്നും പ്രതീക്ഷിക്കണ്ട എന്ന്.അഹങ്കാരം ഇത്തിരി കടന്നു പോയി.മൂഷികസ്ത്രീ പിന്നേം മൂഷികസ്ത്രീ ആകാന്‍ പോവുകയാണ് എന്ന് എനിക്കപ്പോള്‍ അറിയില്ലായിരുന്നു.ഞാന്‍ ശമ്പളമായി വാഗ്ദാനം ചെയ്ത റിയാലിനെ പതിനൊന്നു കൊണ്ടു ഗുണിച്ച്‌,ഇന്ത്യന്‍ രൂപയാക്കി നോക്കി,ഞാന്‍ തന്നെ എന്നില്‍ വലിയ മതിപ്പുളവാക്കി.

രാവിലെ ഏഴ് തൊട്ടു മൂന്നു മണിവരെയാണ് ഓഫീസ് ടൈം.ഓഫീസ് അങ്ങ് ഇന്ഡസ്ട്രിയല് ഏരിയയില്‍.ഇവിടെ നിന്നു കൃത്യം ഇരുപതു കിലോമീറ്റര്‍.ട്രാന്‍സ്പോര്‍ടെഷന്‍ ഉണ്ട്.ആദ്യത്തെ ദിവസമായത്‌ കൊണ്ടു ഹസ് കൊണ്ടു വിട്ടു.തിരിച്ചു അവരുടെ വണ്ടിയില്‍ വരാമല്ലോ..മൂന്നു മണി വരെ എങ്ങനെ അവിടെ ഇരുന്നു എന്നറിയില്ല.തേനീച്ച കൂട്ടില്‍ കയറിയ പോലെ.ആകെ ഒരു മൂളല്‍.ആര്ക്കും,ഒന്നിനും സമയം ഇല്ല.ഈ ലോകം അവരവരുടെ തലയിലാണെന്ന് ഓരോരുത്തര്‍ക്കും ഭാവം ഉള്ള പോലെ.നാളെ തൊട്ടു ഞാനും അങ്ങനെയാകും.നോ,സ്കോപ് ഫോര്‍ "പഞ്ചാര & പരദൂഷണം".നാട്ടിലെ സമാധാനം നിറഞ്ഞ സ്കൂളും,സ്റ്റാഫ് റൂമും ഓര്ത്തു പോയി.

മൂന്നു മണി കഴിഞ്ഞു ,ഡ്രൈവര്‍ വന്നു വിളിച്ചു.പോകാം.കാറ് പ്രതീക്ഷിച്ചു ചെന്നു.പക്ഷെ,കണ്ടത് ഒരു "മുട്ടന്‍ ബസ്സ്"!!! ശോ!! അയല്‍വാസി ചേച്ചി വരുന്നതു കാറിലാണല്ലോ???ഹൊ! ബസ്സെങ്കില്‍ ബസ്സ്...ഒന്നു വീട്ടിലെത്തിയാല്‍ മതി.അയ്യോടാ, ഇതില് ഇത്രമാത്രം ആളുണ്ടായിരുന്നോ?ഹസ്ബന്ടിനെ വിളിച്ചു ഡ്രൈവര്‍ക്ക് കൊടുത്തു.റൂട്ട് അറിയണമല്ലോ.മൂപ്പര് പറഞ്ഞ വഴിയിലൂടെയാണ് യാത്ര എങ്കില്‍ മൂന്നര കഴിയുമ്പോള്‍ ഞാന്‍ വീട് എത്തേണ്ടതാണ്.അതുകൊണ്ട് തന്നെ,എന്‍റെ സ്നേഹമയനായ ഹസ് ഇടക്കിടെ വിളിച്ചു കൊണ്ടിരുന്നു,എത്താരായില്ലേ?ഇതെന്താ എത്താത്തെ?ദോഹ മാത്രമല്ല,ഖത്തര്‍ മുഴുവന്‍ കറങ്ങി കൊണ്ടാണ് ലോകത്തിലെ ഏറ്റവും വലിയ ബസില്‍ ഭാര്യ യാത്ര ചെയ്തു കൊണ്ടിരിക്കുന്നത് എന്ന് മൂപ്പര്‍ക്ക് അറിയില്ലല്ലോ..!! അങ്ങനെ രണ്ടര കൊല്ലമായി കാണാതെ ഇരുന്ന സ്ഥലങ്ങള്‍ എല്ലാം ഒറ്റദിവസം കൊണ്ടു കണ്ടുതീര്‍ത്തു.എന്നെ സമ്മതിക്കണം...


വീട്ടിലെത്തിയത് അഞ്ചു.പത്തിന് !!! മാത്രമല്ല,പിറ്റേ ദിവസം,എന്നെ എടുക്കാന്‍ വരുന്ന സമയം കേട്ട് ഞാന്‍ വല്ലാതായി.രാവിലെ അഞ്ചു.നാല്പതിന്... ഇതിന്,നാട്ടില്‍ ഞാനൊക്കെ "രാവിലെ" എന്ന് പറയാറില്ല."പുലര്‍ച്ചെ" എന്നാണു പറഞ്ഞിരുന്നത്.ആലോചിച്ചു എന്‍റെ സകല നാഡീവ്യൂഹങ്ങളും ഒപ്പം തളര്‍ന്നു.ആറര കഴിയാതെ മോള് എണീക്കില്ല.എല്ലാ വിധ പരീക്ഷണങ്ങളും,മുന്‍‌പേ നടത്തി നോക്കിയിട്ടുള്ളതാണ്. അത്കൊണ്ടു തന്നെ റെഗുലര്‍ സ്കൂളില്‍ ചെര്‍ത്തിയിട്ടും ഇല്ല.വെറും പ്ലേസ്കൂളില്‍.അവള് ഉറങ്ങട്ടെ,കളിക്കട്ടെ,വരക്കട്ടെ,കൂടെ പഠിച്ചോട്ടെ എന്നൊക്കെ വിചാരിച്ചാണ് പ്ലേസ്കൂളില്‍ വിട്ടത്.ഇപ്പോള്‍, അത് എനിക്ക് തന്നെ പാരയായി.എന്ത് ചെയ്യാം..


മോള്‍ എന്നെക്കാണാതെ എന്താക്കിയോ ആവോ?നേരെ ഓടിച്ചെന്നു പൂര്‍ണിമാ ദീതിയുടെ ഫ്ലാറ്റില്‍ ചെന്നു കോളിംഗ്ബെല്ലടിച്ചു.തൊട്ടടുത്ത ഫ്ലാറ്റിലെ പൂര്‍ണിമാ ദീതി ഡേകെയര്‍ നടത്തുന്നത് കൊണ്ടാണ്,ശരിക്കും ഞാന്‍ ജോലിക്ക് പോകാന്‍ തന്നെ തീരുമാനിച്ചത്.ദീതി വാതില്‍ തുറന്നു.കോഴിവസന്ത വന്ന കോഴിയെ പോലെ,അവള്‍ടെ ഇരിപ്പ് കണ്ടു എന്‍റെ ചങ്കൊന്നു പെടച്ചു.ദൈവമേ,ഇതെന്തു പറ്റി?പൂര്‍ണിമ ദീതി,വിശദീകരിച്ചു,പാല് കുടിപ്പിക്കാന്‍ പഠിച്ചപണി പതിനെട്ടു നോക്കിയിട്ടും പറ്റിയില്ലെന്ന്.കുട്ടികളുടെ കൂടെ കളിക്കാനും കൂടിയില്ല,ഉറങ്ങിയില്ല...കാരണം എന്താണെന്നോ,ഞാന്‍ ജോലിക്ക് പോകുമ്പോ അവളെ കൂടെ കൂട്ടിയില്ല എന്ന്.പോരെ? ഇതിലും കൂടുതല്‍ എന്ത് വേണം?സാധാരണ ദിവസങ്ങളില്‍ എന്നും വൈകിയിട്ടു അവിടെ അവള്‍ കളിക്കാന്‍ പോകാരുള്ളതാണ്.ഓടിക്കളിക്കാനും,തലകുത്തിമറിയാനും,അവരുടെ വീട്ടില്‍ നിന്നു എന്തെങ്കിലും സാപ്പിടാനും ഹിന്ദിയൊന്നും അറിയേണ്ട കാര്യം ഇല്ലല്ലോ. എത്ര വിളിച്ചാലും തിരിച്ചു വരാറേ ഇല്ല.വിളക്ക് വക്കാനും,നാമം ചൊല്ലാനും വേണ്ടി,വിളിക്കാന്‍ ചെന്നാല്‍ കോഴിയെ കൊല്ലാന്‍ ഓടിച്ചിട്ട്‌ പിടിക്കുന്നത്‌ പോലെ,നല്ല "എഫര്‍ട്ട് " എടുക്കണം.അതിനെ തുടര്‍ന്ന് ഒരു പത്തു-ഇരുപതു മിനിട്ട് വായ്പൂട്ടാതെയുള്ള കാതടപ്പിക്കുന്ന "സരിഗമ"കേള്‍ക്കാം.ഇതാണ് പതിവു പരിപാടി.ആ പെണ്ണാണ് ഈ മൌനവ്രതം ആചരിച്ചു ഇരിക്കുന്നത്,എന്ത് സല്‍സ്വഭാവിയായ സന്താനം!!



ഭര്‍ത്താവ് ഓഫീസില്‍ നിന്നും വന്നു ഞങ്ങള്‍ ഒരു നീളന്‍മേശ സമ്മേളനം തന്നെ നടത്തി.മോള്‍ടെ കൊച്ചുവെളുപ്പാന്‍കാലത്തെ പള്ളിയുറക്കം എന്‍റെ ജോലിക്കൊരു പാരയായി.ഒരു ബദല്‍ ട്രാന്സ്പോര്ടെഷന് അന്വേഷിച്ചു.ശരിയായില്ല. എനിക്ക് ശമ്പളം വാങ്ങേണ്ടി വരില്ല,പകരം ടാക്സി ഡ്രൈവെരോട് നേരിട്ടു എന്‍റെ ശമ്പളം വാങ്ങികോളാന്‍ പറയേണ്ടി വരുന്ന ഒരു അവസ്ഥ. അത്രയ്ക്കും "കത്തി" ചാര്‍ജ് ..അവസാനം ഭര്‍ത്താവ് മൊഴിഞ്ഞു,"നിനക്കു ജോലിക്ക് പോകാനുള്ള സമയം ആയിട്ടില്ല എന്ന് തോന്നുന്നു."


ഈ മനുഷ്യന്,അടുത്ത ജന്മം നൈറ്റ് ഡ്യൂട്ടിക്ക് മാത്രം പോകുന്ന ഒരു നഴ്സ്നെ ഭാര്യയായി കിട്ടണേന്നു മനസ്സുരുകി പ്രാര്‍ത്ഥിച്ചു കൊണ്ടു,ഓഫീസിലെ തലമൂത്ത സാറമ്മാരെ വിളിച്ച്‌,ഞാന്‍ വരുന്നില്ലെന്ന് ഫോണ്‍ ചെയ്തു പറഞ്ഞു. പണ്ടാണെങ്കില്‍ ഒരു വിചാരിച്ച കാര്യം നടന്നില്ലെങ്കില്‍ വളരെ നല്ല രീതിയില്‍ മോങ്ങിയേനെ.ഇതിപ്പോ,ഈ പ്രായത്തില്‍ ആ നമ്പര് ചേരില്ലല്ലോ,അതുകൊണ്ട് നല്ല സ്റ്റൈലന്‍ മൊരിഞ്ഞ മസാലദോശ ഞാന്‍തന്നെ ഉണ്ടാക്കി,ഞാന്‍തന്നെ വെട്ടിവിഴുങ്ങി....കൂടെ ഓര്‍ത്തു,അന്യ നാട്ടില്‍ വന്നു കുട്ടികളെയും,ഭര്‍ത്താവിനെയും നോക്കി,വീട്ടു ജോലിയും കഴിഞ്ഞു ...പിന്നേ ഓഫീസില്‍ പോകുന്ന സ്ത്രീ രത്നങ്ങളെ സമ്മതിക്കണം....

76 comments:

smitha adharsh said...

ഒരു തൊഴില്‍ അന്വേഷണത്തെ പറ്റി....

കുറ്റ്യാടിക്കാരന്‍|Suhair said...

എന്തായാലും നാളെ മുതല്‍ ജോലിക്ക് പോകുന്നില്ലല്ലോ, ദാ, ഈ തേങ്ങ പൊട്ടിച്ച് കറിക്കരച്ചോ...

Good post.

മലമൂട്ടില്‍ മത്തായി said...

എല്ലാം ഒത്തു വരുന്ന ഒരു ജോലി കിട്ടാന്‍ വളരെ ബുദ്ധിമുട്ടാണ് :-)

Sands | കരിങ്കല്ല് said...

ചിരിച്ചൂട്ടോ! :)

എന്ത് സല്‍സ്വഭാവിയായ സന്താനം!! വിത്തുഗുണം... ;)

പിന്നേയ്‌ മോളൂട്ടിക്കു്‌ കുറച്ചു അല്‍ഭുതമുട്ട വാങ്ങിക്കൊടുക്കൂ...

സ്മിതക്കു്‌ അതിനുള്ളിലെ കാറും കിട്ടും (അപ്പൊ പിന്നെ ടാക്സി പിടിക്കണ്ടല്ലോ)
മോളു ബഹളവും ഉണ്ടാക്കില്ല! :)

ഐഡിയ എപ്പടി?

ഓ.ടോ: ഞാന്‍ സല്‍സ്വഭാവിയായീട്ടോ... (വേണ്ടാത്തതു അന്വേഷിക്കലും, പറയലും, എഴുതലും നിര്‍ത്തി)

Unknown said...

teacher alle. veetil naalu kuttikalkku tution koduthenkilum naalu cash undakkan nokkoo... angineyenkilum vadakayum sadhana vilayum kuthane uyarnna ikkalath aa adarshettanu oru kaithaangu nalkoo. veruthe madi pidichirikkathe

Unknown said...
This comment has been removed by the author.
ജിജ സുബ്രഹ്മണ്യൻ said...

ഹോ എന്റെ സ്മിത കൊച്ചേ ചിരിച്ചു പോയി..എടീ ചക്കപ്പോത്തേ എന്നുള്ള ആ വിളി ഉണ്ടല്ലോ അതെനിക്കു ഒത്തിരി ഇഷ്ടപ്പെട്ടു..


,"നീ ഇന്റര്‍വ്യൂന് ചെന്നിട്ടു അവിടെ പോയി മുട്ടയിട്വോ?"..
ഇതെന്റെ പ്രാണ നാഥന്‍ എന്നോടും ചോദിച്ചിട്ടുള്ള ചോദ്യം ?? എനിക്കപ്പോള്‍ വന്ന അരിശം..നമ്മളെ വെറും ഫൂള്‍ ആക്കുന്ന ഭര്‍ത്താക്കന്മാറ്

എനിക്കിഷ്ടപ്പെട്ടു സ്മിത.നല്ല രസമുള്ള എഴുത്ത്.എന്തായാലും മോള്‍ വലുതായിട്ട് ജോലിക്കു പോയാല്‍ മതി.വീട്ടില്‍ വെറുതേ ഇരിക്കുന്നതിന്റെ സുഖം ഒന്നു വേറെ അല്ലേ ഹ ഹ ഹ

പാമരന്‍ said...

ഹൊ എനിക്കു വയ്യ... എന്‍റെ പെണ്ണുമ്പിള്ളയാണെങ്കില്‍ അടിച്ചിറക്കി വിട്ടാല്‍പോലും പോകില്ല ജോലിക്ക്‌.. :)

പിള്ളേരു സ്വന്തം കാര്യം നോക്കാനാവുന്നവരെ ആരെങ്കിലും ഒരാള്‍ വീട്ടിലിരിക്കുന്നതു തന്നെ നല്ലത്‌.

നല്ല പോസ്റ്റ്‌.

വല്യമ്മായി said...

നല്ല എഴുത്ത്.ജോലി അത്യവശ്യമില്ലാത്തത് കൊണ്ട് കളഞ്ഞ് പോരാന്‍ പറ്റി.ജോലിക്ക് പോകേണ്ടി വരുന്നത് അത്യാവശ്യമായി വന്ന് പലതും ത്യജിച്ചും പോകുന്ന എത്രയോ പേര്‍ :)

Anonymous said...

ജോലി അന്വേഷണം നന്നായി രസിച്ചു. ഒപ്പം നല്ല അടിപൊളി ഭര്‍തൃ ഡയലോഗ്സും. ചക്കപോത്ത്‌, മുട്ട ഇടുമോ??? എല്ലാം അടിപോളി തന്നെ. ഏതായാലും സ്മിതയേ ഭര്‍ത്താവിന്റെ അത്ര ഞങ്ങള്‍ക്ക്‌ അറിയാന്‍ പറ്റില്ലല്ലോ?

ജോലി കിട്ടതിരുന്നത്‌ നന്നായി. അല്ലായിരുന്നെങ്കില്‍ ഈ മനോഹര സംഭാഷണ കഥ ഞങ്ങള്‍ എങ്ങനെ വായിച്ചേനെ?

ഇനി ചുമ്മാതെ പഴയതു പോലെ ഓര്‍ക്കുത്തിക്കോ?

കൂടാതെ ഭര്‍ത്താവിനു എന്റെ വക ഒരു കൈ.

പഴമ്പുരാണംസ്‌.

പിരിക്കുട്ടി said...

ishtamayi....
but vaayichu ente kannu poyi aa black kannikl thulachu kayarunnu ente mathram kuzhappam ano?
any way thank chechi blog sandhrshanathinu....
kodungallur kkari ariyathe pattiyathane...
innu post complete akkittundu try to read patumenkil ...........
kollam nalla ezhuthu orale koodi angane kandu mutty ini muthal i will visit here..........

smitha adharsh said...

കുറ്റ്യാടിക്കാരന്‍ :ഊം..തേങ്ങ പൊട്ടിച്ചു കറിക്ക് അരച്ചു...ഈ വഴി വന്നതിനു നന്ദി..
മലമൂട്ടില്‍ മത്തായി : പറഞ്ഞതു അക്ഷരം പ്രതി ശരി
കരിങ്കല്ല് : വിത്ത് ഗുണം തന്നെ..പറഞ്ഞിട്ട് കാര്യമില്ല.അവള്‍ടെ അച്ഛന്‍ അങ്ങനെ ആയിപ്പോയി..സഹിക്കാതെ പറ്റില്ലല്ലോ..പിന്നെ,പറഞ്ഞു തന്നെ ഐഡിയ ഉഗ്രന്‍..അടുത്ത തവണ പരീക്ഷിക്കാം..പക്ഷെ,ഇവിടത്തെ കിന്‍റെര്‍ മുട്ടയില്‍ ഇതു വരെ ഈ കാറ് കണ്ടിട്ടില്ല കേട്ടോ.. അത് അന്ന് പറയാന്‍ മറന്നു. അന്ന് കരിങ്കല്ലിന്റെ പോസ്റ്റില്‍ കണ്ട ട്ട്സ് എല്ലാം ഇവിടെ കിട്ടിയതില്‍ നിന്നു തികച്ചും വ്യത്യസ്തം.അത്രയ്ക്കും സല്‍സ്വഭാവം ഒന്നും വേണ്ടെന്നേ.ഈ തല്ലു കൊള്ളിത്തരം,ഇപ്പോഴേ കൊണ്ടു നടക്കാന്‍ പറ്റൂ..

siva // ശിവ said...

ഇപ്പോള്‍ മനസ്സിലായില്ലേ നാട്ടിലെ അദ്ധ്യാപന ജോലിയാ നല്ലതെന്ന്....

അങ്ങനെ മൂഷികസ്ത്രീ വീണ്ടും....

ഒരുപാട് ഇഷ്ടമായി ഈ എഴുത്ത്....

സസ്നേഹം,

ശിവ.

smitha adharsh said...

സാദിഖ് ഇക്ക : ഈ ട്യൂഷന്‍ ഐഡിയ ഒക്കെ ഒന്നു പയറ്റി നോക്കിയതാ.എല്ലാം ഫ്രണ്ട്സ്ന്‍റെ മക്കള്‍ ആയതുകൊണ്ട് ഫീസ് ഒന്നും തടഞ്ഞില്ല.റിസള്‍ട്ട് അറിഞ്ഞാല്‍ ബക്കറ്റ് കണക്കിന് മിഠായി മാത്രം കിട്ടി..ഞാന്‍ ഒരു മിസ്. യുനിവേര്സ് മല്‍സരത്തില്‍ പങ്കെടുക്കാന്‍ ഉദ്ദേശിച്ചിട്ടുള്ളത് കൊണ്ടു അത് വേണ്ടെന്നു വച്ചു.എന്‍റെ ഇക്കാ...ഫീസില്ലെന്കിലും,പഠിക്കാന്‍ വരുന്ന പിള്ളേരെ പഠിപ്പിക്കാന്‍ സമ്മതിക്കാതെ എന്‍റെ മോള് കളിക്കാന്‍ ഗാങ്ങ് ഉണ്ടാക്കിയത് മാത്രം മിച്ചം...ഇവിടെ എന്നും,സന്ധ്യ നേരത്ത് "തലതെറിച്ച പിള്ളേരുടെ സംസ്ഥാന സമ്മേളനം" !!!എന്‍റെ മോള് അവരുടെ ലീഡര്‍ !! ആ ദുരാനുഭവം ഒരു പോസ്റ്റ് ആക്കാന്‍ മാത്രം ഉണ്ട്.ഭര്‍ത്താവ് പറഞ്ഞു,"നീ മനുഷ്യനെ ഇങ്ങനെ സഹായിച്ചു കൊല്ലാ കൊല ചെയ്യരുത്.ഇത്തിരി സമാധാനം.. അത് മാത്രം മതി." അങ്ങനെ അത് അവസാനിപ്പിച്ചു.അല്ലാതെ,ട്യൂഷന്‍ എടുത്തു ഭര്‍ത്താവിനെ സഹായിച്ചില്ലെങ്കിലും, മിനിമം ഒരു കോടിപതിയെങ്കിലും ആയാല്‍ കൊള്ളാം എന്നെനിക്കുണ്ടായിരുന്നു.പറഞ്ഞിട്ടെന്താ കാര്യം?തലവര നന്നായില്ല.
കാന്താരികുട്ടി : അതെന്നെ..ഈ ഭാര്യമാരെ ചെറുതാക്കി കാണിക്കുന്ന ഭര്‍ത്താക്കന്മാര്‍ക്ക് നമുക്കൊരു പണി കൊടുക്കണം.ഇനി,മോള് വലുതായി എന്നും പറഞ്ഞു ജോലിക്ക് വിടാതിരിക്കുമോ എന്നാണു അടുത്ത പേടി.പിന്നെ,ഈ വീട്ടിലിരിപ്പും ഒരു സുഖമുള്ള ഏര്‍പ്പാടനെ..ഹി...ഹി..
പാമരന്‍ : ഈ വഴി വന്നു പോസ്റ്റ് വായിച്ചു കമന്റ് ഇട്ടതിനു നന്ദി കേട്ടോ
വല്യാമ്മായി : പറഞ്ഞതു ശരിയ്യാണ് കേട്ടോ..എനിക്കെപ്പോഴും ആ ബോധം ഉള്ളിലുണ്ട്.ശരിക്കും,ഞാന്‍ ചെയ്യുന്നത് തെറ്റാണ് എന്ന് ഇടക്കെന്കിലും ഓര്‍ക്കാരു‌ണ്ട് .കമന്റ് നു നന്ദി.
സേനു ചേട്ടാ : മൂപ്പര് ഒരു ഒന്നൊന്നര കക്ഷിയാ....എപ്പോഴും ഈ ടൈപ്പ് മാത്രമെ വായില്‍ വരൂ..പോസ്റ്റ് വായിച്ചു കമന്റ് ഇട്ടതിനു നന്ദി
പിരിക്കുട്ടി : ബ്ലാക്ക്‌ മാറ്റാന്‍ പറ്റില്ല..ഇതു തന്നെ എത്ര പണിപ്പെട്ടു ഒപ്പിച്ചതാനെന്നോ? ഇതിനെ ഇനി തൊട്ടു കളിച്ചാല്‍ ചിലപ്പോള്‍ ഞാന്‍ ഒരു വഴിയാകും.ഉള്ളത് കൊണ്ടൊക്കെ വച്ചു ഒന്നു അഡ്ജസ്റ്റ് ചെയ്യ് എന്‍റെ കുട്ടീ...പിന്നെ,കൊടുങ്ങല്ലൂര്‍ വിലാപം വായിച്ചിരുന്നു .അസ്സലായിട്ടുണ്ട്.

smitha adharsh said...

ശിവ : നന്ദി പ്രകടനത്തിനിടയില്‍ വന്നത് ഞാന്‍ കണ്ടില്ലായിരുന്നു....ഇപ്പോഴല്ല,ഒരുപാടു മുന്നേ മനസ്സിലായി,നാട്ടിലെ അധ്യാപനം തന്നെ നല്ലത് എന്ന്.കൂടെ,ഈ മരുഭൂമിയെക്കാള്‍ നല്ലത് നമ്മുടെ പച്ചപിടിച്ച നാടു തന്നെ എന്നും.എന്ത് ചെയ്യാം മാഷേ....വിരഹ ദു:ഖം ഭയങ്കരമായി തോന്നി.പ്രിയതമന്‍ കൂടെ ഇല്ലാതെ...."എന്തിനീ ജീവിതം?" എന്ന് വരെ തോന്നിപോയ അവസ്ഥ...ലീവ് കിട്ടിയ ഉടനെ കെട്ടും കെട്ടി,കുട്ടിയെ ഒക്കത്തും വച്ചു ഇങ്ങോട്ട് പോന്നു.
കംമെന്റ്നു നന്ദി കേട്ടോ

ഹരീഷ് തൊടുപുഴ said...

എന്റെ അഭിപ്രായത്തില്‍, സ്മിതയ്ക്കു പറ്റിയ ഏറ്റവും നല്ല ജോലി എഴുത്തുകാരിയായ നല്ലൊരമ്മയാകുന്നതാണ്. പോസ്റ്റിന് അഭിനന്ദനങ്ങള്‍...

Unknown said...

ഈ ഇന്റര്‍ വ്യുനു പോക്ക് രസകരമാണ്
പിന്നെ എനിക്ക് ഒരു സംശയം
ഭര്‍ത്താവ് പറഞ്ഞപ്പോലെ ഇത്രേം ഡിമാന്റുകളോ
സമ്മതിച്ചിരിക്കുന്നു.
ഈ ടീച്ചറുമാര്‍ക്കും പ്രഫസറുമാര്‍ക്കൊക്കെ ഇപ്പോ
എന്നാ ശമ്പളമാണ് കിട്ടുന്നത്
പോരാത്തതിന് തൊട്ടതിനും പിടിച്ചതിനുമൊക്കെ ലീവും
പോരെ
ടീച്ചറെ വല്ല സുകൂളിലും കിട്ടിയിരുന്നെല്‍ ഞാന്‍ നാട്ടില്‍ കൂടിയേനെ(സോറി എനിക്ക് ബി.എഡ് ഇല്ലല്ലോ)

Unknown said...

അല്ല ടീച്ചറെ ടീച്ചറെ എന്ന് കുട്ടികള്‍ വിളിക്കുന്നത് കേള്‍ക്കാന്‍ തന്നെ ഒരു രസമില്ലെ

യാരിദ്‌|~|Yarid said...

അല്ല സ്മിതെ, ചക്കപ്പോത്തിനെ ചക്ക പോത്തെന്നല്ലാതെ വേറെന്താണു വിളിക്കേണ്ടതു..;)മരപ്പട്ടീ എന്നു വിളിച്ചാല്‍ മതിയൊ..;)

ചുമ്മാ..:)

ഹരിശ്രീ said...

ടീച്ചറേ,

രസകരമായ വിവരണം...

ഇനിയെങ്കിലും താമസസ്ഥലത്തിനടുത്ത് ജോലികിട്ടട്ടെ എന്ന് പ്രാര്‍ത്ഥിക്കാം...


:)

നജൂസ്‌ said...

ഈ മനുഷ്യന്,അടുത്ത ജന്മം നൈറ്റ് ഡ്യൂട്ടിക്ക് മാത്രം പോകുന്ന ഒരു നഴ്സ്നെ ഭാര്യയായി കിട്ടണേന്നു മനസ്സുരുകി പ്രാര്‍ത്ഥിച്ചു കൊണ്ടു,ഓഫീസിലെ തലമൂത്ത സാറമ്മാരെ വിളിച്ച്‌,ഞാന്‍ വരുന്നില്ലെന്ന് ഫോണ്‍ ചെയ്തു പറഞ്ഞു.
വളരെ നന്നായി.

ഓഫ്‌
സത്യത്തില്‍ സ്മിതാ എനിക്കും ഇങനെ കഷ്ടപെട്ട്‌ ജോലി ചെയ്യണ്ട ഒരാവശ്യവും ഇല്ല. പിന്നെ വീട്ടുകാര് പട്ടിണികിടക്കണ്ടല്ലോന്ന്‌ കരുതിയ.....
(പഴയ ഒരു തമാശ)

നജൂസ്‌ said...
This comment has been removed by the author.
Sojo Varughese said...

എങ്ങനെ ഇത്ര ചെത്തായി എഴുതുന്നു? നമിച്ചു!!!

Sherlock said...

ഡിമാന്റ്സ് വളരെ കുറഞ്ഞുപോയി :) :)

bloganathan : ബ്ലോഗനാഥന്‍ said...

ആഖ്യാനം നന്നായിരിക്കുന്നു. നിങ്ങള്‍ക്ക് ഒരുമിച്ചിരിക്കാന്‍ പറ്റുന്നുണ്ട്ടല്ലോ. ജോലിയില്ലെങ്കിലും അതു മാത്രം മതി, സന്തോഷിക്കാന്‍.
പിന്നെ, ചക്കേ എന്നത് നല്ല ഒരു വിളിയല്ലെ? എന്റ്റെ ഉണ്ടയോടു ചോദിച്ചു നോക്കു, അവള്‍ പറയും അതെ എന്ന്. :)

ഭൂമിപുത്രി said...

ഇത്രയും ലളിതമായിപ്പറയുമ്പോഴാണ്‍ ചില ധറ്മ്മസങ്കടങ്ങള്‍ ഏറ്റവും ഹൃദയസ്പറ്ശിയാകുക.

Sunith Somasekharan said...

kollaaam ketto...

SreeDeviNair.ശ്രീരാഗം said...

സ്മിത,
മക്കള്‍ക്കുവേണ്ടി
നമുക്ക് ചെയ്യാവുന്ന നല്ല
കാര്യം അവര്‍ വളരുന്നതു
വരെ കഴിയുമെങ്കില്‍
ജോലിക്കുപോകാതിരിക്കുക.

അവര്‍ ,സന്തോഷത്തോടെ,
വളരട്ടെ....

സ്നേഹത്തോടെ,
ചേച്ചി..

അരൂപിക്കുട്ടന്‍/aroopikkuttan said...

പോസ്റ്റ് നന്നായിട്ടുണ്ട്!

എന്റെ"സ്വപ്നങ്ങള്‍ കൊണ്ട് ഒരു മിനുങ്ങാമിനുങ്ങല്‍!!"എന്നൊരു പുതിയ പോസ്റ്റുണ്ട്!നോക്കണേ...പ്ലീസ്....കമന്റ്റിടണേ...പ്ലീസ്...
വായനക്കാരെ ചാക്കിട്ടുപിടിക്കാനുള്ള വിദ്യകള്‍ പഠിച്ചുതുടങ്ങിയിട്ടില്ല!
അതുകൊണ്ട് എന്റെയൊരു ഗുരു പഠിപ്പിച്ചപോലെ എരക്കുന്നു!!

Manu said...

I read the blog very late, exactly now Sunday afternoon.As usual you made it hilarious.
Sadiq advised you to take tuition at home.. dear sadique, who will come for tuituon to an MA "History" teacher. vere oru subject kittathavumbol, manushyar edukkunna subject alle History. Alice polum ( Innocentne bharya ) ee subject edukumennu thonunnilla.
what is connection with Alice... aah,, Innocent also calls his wife "edee chakka potthe"..ha ..ha
oru vidham bhangiyayi deshyam vannirikumallo......
ennaal kurachu serious kaaryam parayaam.
(1) You will be "typecast" in future writing. I mean, readers may start to think Smitha can write only hilarious / humorous articles. Please try something else also. You can do .
(2) Kuttikalku vendi, kudumbathinu vendi ..... ennoke dialogu parayaan kollam. But I prefer you go for job. ingane advise cheyyunnavar mikkavarum - either those who enjoy housewfe status / or those who do not send their wives to work.

amruthcd said...

വായിച്ചു തുടങ്ങിയാല്‍ തീരാതെ നിര്‍ത്തില്ല,,ഒരു സാദാരണ സംഭവം
രസകരമായി അവതരിപ്പിച്ച സ്മിതയ്ക്ക് അഭിനന്ദനങ്ങള്‍

smitha adharsh said...
This comment has been removed by the author.
smitha adharsh said...

ഹരീഷ് : കമന്റ് നു നന്ദി കേട്ടോ...
അനൂപേ : പറഞ്ഞതു വാസ്തവം ആണ് കേട്ടോ...ടീച്ചര്മാര്കും നല്ല സാലറി ആയി.പിന്നെ,കുട്ടികള് ടീച്ചറെ എന്ന് വിളിക്കുന്നത് കേള്ക്കാന് രസമല്ല,"അഭിമാനം" ആണ് തോന്നാറ്... പോസ്റ്റ് വായിച്ചതിനു നന്ദി കേട്ടോ..
യാരിദ് : മരപ്പട്ടി വേണ്ട....ചക്ക പോത്ത് തന്നെ മതി കേട്ടോ...ചുമ്മാ
ഹരിശ്രീ..: ചേട്ടാ പ്രാര്‍ത്ഥനയ്ക്ക് നന്ദി
നജൂസ് : പഴയ തമാശയാണെങ്കിലും ചിരിച്ചു..
കാക്ക : ഈ വഴി വന്നതിനു നന്ദി
ജിഹേഷ് : കളിയാക്കിയതാണ് അല്ലെ? മിടുക്കന്‍
bloganathan : ഇയാളുടെ ഉണ്ട പറയുമ്പോലെ എനിക്കും അത് തന്നെയാ പറയാനുള്ളത്..ഒരുമിച്ചു ജീവിക്കുന്നത് ഒരു ഭാഗ്യം തന്നെയല്ലേ..?
ഭൂമിപുത്രി : പോസ്റ്റ് വായിച്ചു കമന്റ് ഇട്ടതിനു നന്ദി കേട്ടോ
My......C..R..A..C..K........Words : thanks

SreeDeviNair : ചേച്ചി പറഞ്ഞതു കാര്യമാണ്..ഇവിടെ വന്നതില്‍ സന്തോഷം
അരൂപികുട്ടന്‍ : വായിക്കാം കേട്ടോ...കമന്റും ഇടാം..ഇനി,ഇറക്കേണ്ടി വരില്ല.നല്ല പോസ്റ്റ് ആണെന്കില്‍ കമന്റ് താനേ വരും

amruthcd : thanks..

smitha adharsh said...
This comment has been removed by the author.
smitha adharsh said...

മനോഹര്‍ ജീ : കമന്റ് വായിച്ചു...പോസ്റ്റ് വായിച്ചു കമന്റ് ഇട്ടതിനു നന്ദി.വായിച്ചപ്പോള്‍ തോന്നിയത് ദേഷ്യമല്ല..പകരം ഒരു ചെറിയ വിഷമം.എം.എ.ഹിസ്റ്ററി എന്നത് ഇത്രയും മോശമായ ഒരു സബ്ജെക്ട് ആണ് എന്ന് മനസ്സിലാക്കി തന്നതിന് നന്ദി.വേറെ ഒരു വിഷയവും കിട്ടാതെ വന്നപ്പോള്‍,എടുതതോന്നും അല്ല ഈ ഹിസ്റ്ററി.പഠിക്കാനുള്ള ഇഷ്ടം കൊണ്ടു തന്നെ എടുത്തതായിരുന്നു..ആദ്യമായാണ്‌ ഒരാള്‍ ഇങ്ങനെ പറയുന്നതു കേട്ടത്.വഴിയേ പോകുന്ന ഒരാള്‍ക്കും കാലിക്കറ്റ്‌ യൂണിവേര്സിടി ഒരു എം.എ.ഹിസ്റ്ററി ബിരുദം കൊടുത്തതായി എനിക്കറിവില്ല.
ഞാനും ഏകദേശം ഒരു ഇരുപത്തിരണ്ടു വര്‍ഷത്തോളം കഷ്ടപ്പെട്ട് പഠിച്ചിട്ടു തന്നെയാണ് മാഷേ,ഈ എം.എ.ഹിസ്റ്ററി,ബി.എഡ് ,ഒക്കെ എടുത്തത്‌.

ഏതൊരു ബിരുദാനന്തര ബിരുദ കോഴ്സ്‌ പോലെ തന്നെ,ഇതിനും ഫസ്റ്റ് ഇയര്‍ അഞ്ചു തിയറി പേപ്പറും,വൈവയും ...സെക്കന്റ് ഇയര്‍ അഞ്ചു പേപ്പറും,വൈവയും ഒക്കെ മുറ പോലെ തീര്‍ത്തിട്ട് തന്നെയാണ് എം.എ.കിട്ടിയത്.
ഇവിടെ അടുത്ത ഫ്ലാടുകളിലെ കുട്ടികള്ക്ക് ഞാന്‍ ഏത് സബ്ജെക്ട് ആണ് എടുക്കുന്നത് എന്ന് പോലും അറിയില്ല.എട്ടാം ക്ലാസ്സിലെ കുട്ടിക്ക് പോലും,ഫിസിക്സ് ഞാന്‍ എടുത്തിരുന്നുഞങ്ങളുടെ നാട്ടില്‍ വെറും പത്താം ക്ലാസ്സ് വരെ പഠിച്ച ഒരു ട്യൂഷന്‍ ടീച്ചര്‍ ഉണ്ടായിരുന്നു,കക്ഷി നല്ല അസ്സലായി കുട്ടികള്ക്ക് ക്ലാസ്സും എടുത്തിരുന്നു...ഇതൊക്കെ കെമിസ്ട്രി യിലോ,ഫിസിക്സ് ലോ ഒരു ബിരുദവും എടുത്തിട്ടല്ലായിരുന്നു.
പിന്നെ, എനിക്ക് കിട്ടിയ ജോലി,സ്കൂള്‍ മാനേജര്‍ ക്ക് ലക്ഷങ്ങള്‍ എന്നി കൊടുത്തു കിട്ടിയ ഒരു പദവിയും ആയിരുന്നില്ല.മുറപോലെ,ടെസ്റ്റ് എഴുതി,റാങ്ക്‌ ലിസ്റ്റില്‍ വന്നു,ഇന്റര്‍വ്യൂ കഴിഞ്ഞതിനു ശേഷം കിട്ടിയ ജോലി തന്നെ..അവര്ക്കു വേണമെന്കില്‍,സോഷ്യല്‍ സ്ടഡീസ് നു ഒരു എം.എസ്.സി.കഴിഞ്ഞ ആളെ വക്കാംആയിരുന്നല്ലോ..അവര്ക്കു മനോഹര്‍ജിയുടെ ഈ ദീര്‍ഘ വീക്ഷണം ഉണ്ടാവാതെ പോയി.
അതുപോലെ,നമ്മുടെ നാട്ടിലെ പ്രമുഖ ചരിത്രകാരനായ,എം,ജി.എസ്.നാരായണന്‍ സാറും മറ്റും എം.എ.ഹിസ്റ്ററി ക്കാരാണ് എന്നാണു എന്റെ അറിവ്....ചരിത്രകാരന്മാരാകാന്‍ ചരിത്രം പഠിക്കേണ്ട എന്ന് മനോഹര്‍ ജി..പഠിപ്പിച്ചു തന്നു...വളരെ വലിയ നന്ദി ഉണ്ട്....എന്റെ സ്കൂള്‍ കാലത്തു പോലും,കുട്ടികള്ക്ക് സോഷ്യല്‍ എടുത്തിരുന്ന ടീചെര്മാരോട് കുട്ടികള്‍ യാതൊരു വിധ പക്ഷപാതവും കാണിച്ചു കണ്ടിട്ടില്ല.... ഏത് വിഷയമെടുക്കുന്ന ടീച്ചര്‍ ആയാലും കുട്ടികള്‍ ബഹുമാനിക്കുന്നതെ കണ്ടിട്ടുള്ളു..

പിന്നെ,ആലീസും,ഇന്നസെന്റും....കേരളത്തിലെ ആദ്യത്തെ അറിയപ്പെടുന്ന ഒരു ഇരുപതിയന്ച്ചു കുടുംബാങ്ങങ്ങളില്‍ വേണമെന്കില്‍ ഇന്നസെന്റും,കുടുംബവും പെട്ടേക്കാം.അതുകൊണ്ടാണല്ലോ,മനോഹര്‍ ജിക്ക് ഇന്നസെന്റ് ,തന്റെ ഭാര്യയെ എന്ത് വിളിക്കുന്നു എന്ന അറിവ് കിട്ടിയത്.... അത് ഒരു ഭാഗ്യമല്ലേ..ഒരു സാധാരണ ഭാര്യക്ക് കിട്ടാത്ത ഭാഗ്യം...പോത്ത്‌ ആണെന്കിലും,നാലാള്‍ അറിയുന്ന ഒരാളുടെ ഭാര്യ ആയില്ലേ?

പിന്നെ,എനിക്കിതൊക്കെ കേള്‍ക്കണം...എന്റെ ഭര്‍ത്താവ് പറയും പോലെ,വെറുതെ വീട്ടുകാര്യങ്ങള്‍ വാരിവലിച്ചു പോസ്റ്റ് ആക്കി എഴുതിയത് കൊണ്ടല്ലേ...ഈ വിവരക്കേടിന്നു ...മറ്റുള്ളവരുടെ വായിലിരിക്കുന്നത് കേള്‍ക്കേണ്ടി വന്നത്?....ഈ അടി എനിക്ക് ആവശ്യമായിരുന്നു..


പിന്നെ,സീരിയസ് ആയി പറഞ്ഞ കാര്യം...ശ്രദ്ധയില്‍ പെടുത്തി...വരവ് വച്ചിട്ടുണ്ട്....പരിഗണിക്കാം

Sands | കരിങ്കല്ല് said...

പോസ്റ്റ് നന്നായിരുന്നു എന്നതൊക്കെ മുമ്പേ പറഞ്ഞതാ.. വീണ്ടും പറയുന്നില്ല..

ഈ മനോഹര്‍ എന്ന കക്ഷിക്കു കൊടുത്ത മറുപടി ഇല്ലേ...
അതി മനോഹരം!

മറുപടി കൊടുക്കുന്നെങ്കില്‍ ഇങ്ങനെത്തന്നെ കൊടുക്കണം.!!

Hats off!! കൊടുകൈ!! :)

സന്ദീപ്.

മാണിക്യം said...

ഇതു വായിചു തീരുമ്പോള്‍ മണി രാത്രി 12:45
എന്നാലും വേണ്ടില്ലാ മറുപടിച്ചിട്ട് തന്നെ കാര്യം
മോള്‍ക്കു വേണ്ടി ആ ജോലി വേണ്ട എന്ന് വച്ചതില്‍ ഒരു തെറ്റും ഇല്ലാ .. വീട്ടില്‍ ഇരുന്ന് ആ മോളുടെ വളര്‍ച്ചയില്‍ കാര്യമായപങ്കു വഹിക്കാം
സ്വന്തം അമ്മയുടെ കൂടെ വളരുന്ന മകളുടെ ആത്മവിശ്വാസവും കഴിവും പതിന്മടങ്ങ ഇരട്ടിയാണു .. മോള്‍ റെഗുലര്‍ സ്കൂളിങ്ങ് തുടങ്ങുമ്പോള്‍ ജോലിക്ക് പോകാം ..
അതു വരെ നന്നയി എണ്ണതേച്ചു കുളിച്ച് മസാല്‍ ദോശയും നെയ് റോസ്റ്റും തിന്ന് ഇരിക്ക്...

smitha adharsh said...

കരിങ്കല്ല് : നന്ദി..ഇതുപക്ഷേ,ഞങ്ങള്‍ സ്ഥിരം നടത്താറുള്ള ഒരു "വാക്പയറ്റ്" മാത്രമാണെന്നേ..മൂപ്പര് എന്നെ irritate ചെയ്യാന്‍ ഒരു പോയിന്റ് ഇട്ടു തരും..ഞാന്‍ അതെടുത്ത് തിരിച്ചു വീക്കും.അതുപോലെ,ഞാനും വടി അങ്ങോട്ട് കൊടുത്തു അടി ഇങ്ങോട്ട് ഇരന്നു വാങ്ങാറുണ്ട്...നമ്മളൊക്കെ ചെയ്യുന്നത് പോലെ..ഇതു ഒരു അമ്മാവന്‍ - മരുമകള്‍ യുദ്ധം ആണ് മാഷേ...പിന്നെ,കഷ്ടപ്പെട്ട് പഠിച്ചു നേടിയെടുത്ത എം.എ.ഹിസ്റ്ററിയെ തൊട്ടു കളിക്കാന്‍ വന്നപ്പോള്‍,തിരിച്ചടിച്ചു..അത്ര മാത്രം..ഇതുപോലെ ഇനിയും കാണാം കേട്ടോ....കാത്തിരുന്നോളൂ..

മാണിക്യം ചേച്ചീ.. : പാതിരാത്രിക്കാനെന്കിലും പോസ്റ്റ് വായിച്ചതിനു നന്ദി..മാണിക്യം ചേച്ചി പറഞ്ഞതു പോലെ,വീട്ടില്‍ ഇരുന്ന് ആ മോളുടെ വളര്‍ച്ചയില്‍ കാര്യമായപങ്കു വഹിക്കാം എന്ന് കരുതി.
സ്വന്തം അമ്മയുടെ കൂടെ വളരുന്ന മകളുടെ ആത്മവിശ്വാസവും കഴിവും പതിന്മടങ്ങ ഇരട്ടിയാണു .. അതെത്ര ശരിയാണെന്നോ?അമ്മയുടെ ഗവണ്മെന്റ് ജോലി കാരണം,ഞങ്ങള്‍ മക്കള്‍ ചിലപ്പോഴെന്കിലും എത്ര വിഷമിച്ചിട്ടുണ്ട് എന്നറിയുമോ?സ്കൂള്‍ വിട്ടു വീട്ടിലേക്ക് കയറി വരുമ്പോള്‍,എന്നും മനസ്സില്‍ ഒരു പേടിയും,അസുരക്ഷാ ബോധവും ആയിരുന്നു ... അന്ന് ഞാന്‍ ഒരുപാടു ആശിച്ചിട്ടുണ്ട്,അമ്മ ജോലിക്ക് പോകാതിരുന്നെന്കില്‍,സ്കൂള്‍ വിട്ടു വരുമ്പോള്‍ അമ്മ ഉമ്മറത്ത്‌ കാത്തു നിന്നിരുന്നെന്കില്‍ എന്നൊക്കെ...അപ്പൊ,പറഞ്ഞതു പോലെ,മോള് വലുതാവുന്നത് വരെ,എണ്ണ തേച്ചു കുളിയും,വച്ചുണ്ടാക്കി തീറ്റയും..ഓക്കേ..

Anonymous said...

helo smitha..late ayi anu ithu kandathu...
"ente thozhilanweshana pareekshakal" ennu oru book ezhuthu...
Doha yi ayalum Dubail ayalum yojicha thozhil kittanam enkil luck venam...Ellam othu varunna joli...ente wife nu 3 years kazhinjittanu othu vannathu..
Ippol pullikkari happy...Straight shift...swantham car...Govt joli...ente athrayum salary...friday/sat Off...

But ellarkum aa luck undavanam ennilla...
Ezhuthu nannavunnundu...

Haris from doha

ഹാരിസ്‌ എടവന said...

സ്മിതാ പലഭര്‍ത്താക്കന്‍ മാരും ഭാര്യയുടെ ശല്യം സഹിക്ക വയ്യാതയാണു ജോലിക്കു പറഞ്ഞയക്കുന്നത്.
എന്റെ സുഹ്രുത്ത് എന്നും പറയുമായിരുന്നു.ഭാര്യ വരുന്നുണ്ട്.ഉടനെ ഒരു ജോലികണ്ടൂവെക്കണം..അല്ലെങ്കില്‍ വീട്ടില്‍ രാവിലെ മുതല്‍ വൈകുന്നേരം വരെ വെറുതെയിരുന്നു എന്റെ തല തിന്നാനുള്ള വകുപ്പു അലോചിച്ചു വെക്കും ന്നു.
എന്തായാലും വിവരണം നന്നായി.

ഇന്ദു said...

hi chechi..thozhil anveshnathe patti vayichu!!!valare nannayi ezhuthiyirikkunu!!oru 3-4 masathinullil njanum itu pole joli anveshichu arabi naadukaliloode nadakkumalo enna allochichapol oru vishamam!!

pinne chechi,manohar ji-kku kodutha comment-um kollam!!veetile karyangal ellarumayi panku vechathinu enikku kittiyitundu ithu polulla comments!!but nammalara makkal..apara tholikkati yalle..hahaha..
officil-ninum comment adikunna kondanu e manglish!!sadayam kshamikku!!

മുഹമ്മദ്‌ സഗീർ പണ്ടാരത്തിൽ said...

ടീച്ചറേ,രസകരമായ വിവരണം.

Typist | എഴുത്തുകാരി said...

അപ്പോ ടീച്ചറാണല്ലേ, അതിപ്പഴാ മനസ്സിലായതു്.
ഒട്ടും സംശയം വേണ്ടാ, ജോലിക്കൊന്നും പോകാതെ ഇങ്ങനെ മടിച്ചു വീട്ടിലിരിക്കുന്നതും ഒരു സുഖം തന്നെയാ.

അശ്വതി/Aswathy said...

നല്ല പോസ്റ്റ് സ്മിതാ .
ജോലിയും വീടും ...അതൊരു സര്‍ക്കസ് തന്നെ ആണ്.
ഏതായാലും ഇനി സുഖമായി വീട്ടില്‍ ഇരിക്കല്ലോ. എന്റെ വക അസൂയ രേഖപ്പെടുത്തുന്നു.

വിഷം said...

സ്മിതെച്ചി,
വളരെ നന്നയി. ഒരു ഗള്‍ഫ് ജോലിയുടെ എല്ലാ വശങ്ങളും നന്നായി പുറത്തു വന്നു. നാട്ടില്‍ ഉള്ളവരുടെ അടുത്ത് ഏതൊക്കെ പറഞ്ഞാല്‍ വിശ്വസിക്കില്ല. കാശല്ലേ കിട്ടുന്നത് എന്ന് പറയും.ജീവിക്കാന്‍ പെടുന്ന പാട് നമ്മക്കല്ലേ അറിയൂ.
വിഷം .

oru mukkutti poovu said...

ഇന്ന് ജൂലൈ 16 .. വെറും ആര് ദിവസം കൊണ്ട് നല്പതിയഞ്ചില്‍ കൂടുതല്‍ കമന്റ്സ് ...
വായിച്ചവര്‍ ചിലപ്പോള്‍ അതില്‍ കൂടുതല്‍ കാണാം .. വളരുകയാണ് ഈ കഥാകാരി .. ഉള്ളടക്കം നേരത്തെ അറിയമായിരുന്നെന്കിലും ... വായിക്കാന്‍ മുഷിച്ചില്‍ തോന്നാത്ത ശൈലി ... കേട്ടതിലേറെ രസം .. ഗംഭീരം .

അല്ഫോന്‍സക്കുട്ടി said...

ചക്കപോത്തേ ജോലിക്ക് പോവുമ്പോ ഇങ്ങനെ പോണം. ശമ്പളം വല്ലതൂം കിട്ടിയോ? ഒരു ദിവസത്തെ സാലറി ചോദിച്ചു വാങ്ങണേ. ഞാന്‍ സ്വന്തം ഓഫീസ് തുറങ്ങുമ്പോ അപ്പോയ്ന്റ് ചെയ്യാട്ടോ.

വാളൂരാന്‍ said...

ടീച്ചറേ പറയാതിരിക്കാനാവില്ല, പിടിച്ചിരുത്തിവായിപ്പിക്കുന്ന എഴുത്ത്... ടീച്ചറെ എന്തെങ്കിലും ഒരു സാധ്യതയുണ്ടെങ്കില്‍ ജോലിക്കു പൊകരുതെന്നാണ് എന്റെ അഭിപ്രായം.... കാരണം നന്ദനക്കിപ്പോ ടീച്ചറെ വേണ്ട സമയമാണ്, കുട്ടി അല്പം കൂടി വലുതാവുമ്പോള്‍ വീട്ടിലിരുന്ന് വട്ടാവുന്നതിലും നല്ലത് ജോലിക്കു പോവലാണ്.
പിന്നെ അല്പം സ്വാര്‍ത്ഥത, നിങ്ങള്‍ ജോലിക്കുപോകാതിരിക്കുമ്പോഴല്ലേ ഇങ്ങനെയൊക്കെ എഴുതാന്‍ സാധിക്കൂ ഞങ്ങള്‍ക്ക് വായിക്കാനും.

Rafeek Manchayil said...

Vaayichu thudangiyappol thonni...Dohakoottathiley Eee teacharey Ind.Areayayiley Hondayil vech endey Car Servicinu kodukkumbozhegilumonnu kanamallo ennu ......Etha kidakkunnu puthom thazha........... Nannnayi joli nirthiyathu.....Assalayittundu ....
Athu njanendey bharyayodu parajal njan pattini....

ഒരു സ്നേഹിതന്‍ said...

എനിക്ക് പാവം തോന്നുന്നു... എന്ത് ചെയ്യാന്‍....

ചന്ദ്രകാന്തം said...

സ്മിതേ,
ഇപ്പോഴാണ്‌ ഇത്രേം വെല്യൊരു സാഹസം, ഇത്ര രസായിട്ട്‌ വായിയ്ക്കാന്‍ പറ്റീത്‌.
ഗള്‍ഫിലെ ജോലീടെ എല്ലാ മുക്കും മൂലയും പുറത്തെടുത്ത്‌ കാട്ടുന്നുണ്ട്‌ വരികള്‍. നന്നായി.
ഇനീപ്പൊ ഏതായാലും മോള്‍ പഠിയ്ക്കാന്‍ പോയിത്തുടങ്ങീട്ട്‌ മതീട്ടൊ അടുത്ത അഭ്യാസം.
:)

smitha adharsh said...

ഹാരിസ് ദോഹ : ഒരുനാള്‍ ഞാനും ഹാരിസ് ചേട്ടന്‍റെ ഭാര്യയെ പോലെ വളരും വലുതാകും..
പോസ്റ്റ് വായിച്ചു കമന്റ് ഇട്ടതിനു നന്ദി
ഹാരിസ്‌ എടവന : അയ്യട എന്താ ഒരു പൂതി....തമാശ ഇഷ്ടപ്പെട്ടു
ഇന്ദു : അറബി നാട്ടിലേക്ക് സ്വാഗതം....നല്ല ജോലി കിട്ടിയാല്‍ പൊക്കോളൂ ട്ടോ.
മനോഹര്‍ജിയും ഞാനും ഈ "തല്ലു പിടുത്തം"പതിവുള്ളതാ....സാധാരണ മെയില് വഴി ആണ് പതിവ്.ഇതിപ്പോള്‍,കമന്റ് ആയതു കൊണ്ടു എല്ലാവരും കണ്ടു എന്ന് മാത്രം

ഞാനും എന്റെ കുറച്ചു ബ്ലോഗുകളും : സഗീര്‍ ഇക്കാ..ഇവിടെ വന്നതിനു നന്ദി
Typist | എഴുത്തുകാരി: ഹ്മം..ടീചര്‍ ആണ്..വീട്ടിലിരിക്കാന്‍ സുഖമൊക്കെ ഉണ്ട്.എന്നാലും മടി പിടിച്ചിരിക്കാന്‍ ഒരു വിഷമം
അശ്വതി/അശ്വതി : ആശ്വതിടെ കുശുംബിനു നന്ദി
വിഷം : ഈ പോസ്റ്റ് വായിച്ചു കമന്റ് ഇട്ടതിനു താന്ക്സ്
oru mukkutti പൂവ് : ഇവിടെ വന്നതില്‍ സന്തോഷം..കമന്റ് കൂടുന്നതും,കുറയുന്നതും അല്ലല്ലോ കാര്യം..എന്നാലും,ഇവിടെ എല്ലാവരും വായിക്കാന്‍ ഓടിവരുന്നതില്‍ സന്തോഷം ഉണ്ട്..കമന്റ് ഇടുന്നതിലും.

smitha adharsh said...

അല്ഫോന്‍സക്കുട്ടി : ഓഫീസ് തുടങ്ങുമ്പോള്‍ പറയണേ..വരാം.പിന്നെ,ഈ വഴി വന്നതിനു നന്ദി.ആ ഒരു ദിവസത്തെ സാലറി കിട്ടിയില്ല.പോയി ചോദിച്ചു നോക്കാം ല്ലേ.
വാളൂരാന്‍ ചേട്ടാ : ഇല്ല, നന്ദ വലുതായിട്ടെ ഇനി ജോലിക്ക് പോകുന്നുള്ളൂ...അതുവരെ,തീറ്റയും,കുടിയും,ബ്ലോഗ് എഴുത്തും മാത്രം
കമന്റ് നു നന്ദി
Rafeek Manchayil : പോസ്റ്റ് വായിച്ചു കമന്റ് ഇട്ടതിനു താന്ക്സ്.industrial area yil വച്ചു കാണാന്‍ വകുപ്പില്ലല്ലോ..ഒരു ദിവസം,ഞാന്‍ ദോഹ കൂട്ടത്തിലുള്ളവരെ കാണാന്‍ അങ്ങോട്ട് വരുന്നുണ്ട്
അപ്പോള്‍,നേരിട്ടു കാണാലോ?
ഞാനും ഇപ്പോള്‍ അതിലെ ഒരു മെമ്പര്‍ ആണ് കേട്ടോ..ഏക സ്ത്രീ സാന്നിധ്യം.
ഒരു സ്നേഹിതന്‍ : അങ്ങനെ ഇപ്പം പാവം തോന്നണ്ട...ഞാന്‍ നല്ല അസ്സല്‍ ജോലി കണ്ടുപിടിച്ചു പോകും മാഷേ..അങ്ങനെ വിട്ടു കൊടുക്കാന്‍ ഉദ്ദേശിച്ചിട്ടില്ല.
ചന്ദ്രകാന്തം : അടുത്ത അഭ്യാസം മോള് വലുതായിട്ട് തന്നെയേ ഉള്ളൂ....പോസ്റ്റ് വായിച്ചതിനു താന്ക്സ്

Sentimental idiot said...

thankyou teachere oru padu santhosham idakku iniyum varanam..............shafeek

Unknown said...

It was good...

Bindhu Unny said...

നന്നായി എഴുതിയിരിക്കുന്നു, സ്മിതേ. കുറെ ഉപദേശവും കിട്ടീട്ടുണ്ടല്ലോ. :-)

KPM. Musthafa said...

good..!!

KPM. Musthafa said...

Best wishes...!

Unknown said...

ethu swantham anubhavathil ninnezhuthiyathano?athrakku manoharamayirikkunnu!!!!!!!!1 goood..........realy......good

Anil cheleri kumaran said...

good language
have a unique variety of
humour sense
will reach high peaks..
congrats!!!

രസികന്‍ said...

രസകരമായ വിവരണം കൊണ്ട് മികവുറ്റതായിരുന്നു,
പ്രവാസ ജീവിതത്തിലെ പല സത്യങ്ങളിൽ ഇതുംകൂടി...

ഗൾഫിൽ ഭർത്താവിനും, ഭാര്യക്കും ജോലിയുണ്ട് എന്നു പറഞ്ഞ് നാട്ടിൽ നിന്നും അസൂയക്ക് ഒരു കുന്തവുംകൂടി കൊടുത്ത് നോക്കിക്കാണുന്നവരെ, നിങ്ങൾ ഒരു നിമിശം ചിന്തിക്കുക.
പ്രവാസിയുടെ പണത്തിനും വിയർപ്പു തുള്ളികളുടെ ഗന്ധമുണ്ട്, അതു മറക്കാ‍ൻ അവർ ചിലപ്പോൾ അറബി അത്തറുകൾ ഉപയോഗിക്കുന്നുണ്ടാവാം പക്ഷെ അതവന്റെ അഹങ്കാരമല്ലെന്നോർക്കുക ....

സസ്നേഹം രസികന്‍

Kichu $ Chinnu | കിച്ചു $ ചിന്നു said...

ചിരിപ്പിച്ചു....
മോള്‍ വേഗം വലുതായീട്ട്, ജോലിക്ക് പോയിട്ട്, ഒരു പാട് കാശ് കിട്ടീട്ട്, ബാങ്ക് ബാലന്‍സൊക്കെ കൂട്ടീട്ട്, ഓഫീസില്‍ പോകാന്‍ കാറൊക്കെ മേടിച്ചിട്ട്, ......
അങങനെ ഒക്കെ വരുമ്പോഴുമിതുപോലെ ഇടക്കൊക്കെ പോസ്റ്റാന്‍ മറക്കരുതേ :)

ശ്രീ said...

സാരല്യ ചേച്ചീ... ഒരു ജോലി പോയാല്‍ ഒമ്പതു ജോലി കിട്ടുമെന്നാ...

അടുത്ത ജോലി കുറേക്കൂടി നല്ല സ്ഥലത്ത് (നമുക്കിഷ്ടമുള്ള ടൈമിങ്ങില്‍) കിട്ടും‌ന്നേ... :)

മോളൂട്ടിയെ വൈകുന്നേരങ്ങളില്‍ ഓടിച്ചിട്ടു പിടിയ്ക്കുന്നത് ഓര്‍ത്തു ചിരിച്ചു. (പാവം)
:)

അരുണ്‍ രാജ R. D said...

പണ്ടാണെങ്കില്‍ ഒരു വിചാരിച്ച കാര്യം നടന്നില്ലെങ്കില്‍ വളരെ നല്ല രീതിയില്‍ മോങ്ങിയേനെ.ഇതിപ്പോ,ഈ പ്രായത്തില്‍ ആ നമ്പര് ചേരില്ലല്ലോ,അതുകൊണ്ട് നല്ല സ്റ്റൈലന്‍ മൊരിഞ്ഞ മസാലദോശ ഞാന്‍തന്നെ ഉണ്ടാക്കി,ഞാന്‍തന്നെ വെട്ടിവിഴുങ്ങി....


ഇത്ര കുഞ്ഞു സംഭവം...(സോറി, എനിക്ക് അങ്ങനാ തോന്നിയത്...) ഇത്ര പെരുപ്പിച്ചു എഴുതി ചിരിപ്പിച്ച കഴിവുറ്റ എഴുത്തുകാരിക്ക് അഭിനന്ദനങ്ങള്‍...

ഒരു പുഞ്ചിരിയോടെ,
അരുണ്‍ രാജ

joice samuel said...

നന്നായിട്ടുണ്ട്......
നന്‍മകള്‍ നേരുന്നു.....
സസ്നേഹം
മുല്ലപ്പുവ്..!!

ഒറ്റയാന്‍ said...

രണ്ടര കൊല്ലമായി കാണാതെ ഇരുന്ന സ്ഥലങ്ങള്‍ എല്ലാം ഒറ്റദിവസം കൊണ്ടു കണ്ടുതീര്‍ത്തു.എന്നെ സമ്മതിക്കണം...
ചിരിച്ചുപോയീട്ടോ..........
നിസ്സാരമായ ഒരു സംഭവം രസകരമായി അവതരിപ്പിച്ചിരിക്കുന്നു. നന്നായിട്ടുണ്ട്‌.

ഗൗരിനാഥന്‍ said...

ജോലി ചെയ്തില്ല്യെല്‍ ജീവിക്കാന്‍ പറ്റാത്തവരുടെ കാര്യം കഷ്ടം തന്നെ അല്ലെ?

smitha adharsh said...

welcome to the shadows of life :ശരി മാഷേ...ഇതു തന്നെ ഞാന്‍ തിരിച്ചും പറയാം..ഓക്കേ

Adharsh :അപ്പൊ,ഈ പോസ്റ്റ് വായിച്ചി അല്ലെ...നല്ല കുട്ടി..

ബിന്ദു: ഉപദേശം കുറെ കിട്ടി...ഇങ്ങനെയൊക്കെയല്ലേ..എന്നെ ഉപദേശിച്ചു നന്നാക്കാന്‍ പറ്റൂ....

എനിക്കാനെങ്കില്‍ എന്നെ ഉപദേശിക്കുന്നത് തീരെ ഇഷ്ടമല്ല..പോസ്റ്റ് വായിച്ചതിനു നന്ദിയുണ്ട്.

മുസ്തഫ : ഈ വഴി വന്നു പോസ്റ്റ് വായിച്ചതിനു നന്ദി കേട്ടോ..

റിബു ചേട്ടാ : ഇതു സ്വന്തം അനുഭവം തന്നെ...ഓര്‍ക്കുന്നോ,നമ്മള്‍ അവസാനം കണ്ടപ്പോള്‍ എല്ലാവരും കൂടി ഇതിന് ട്രീറ്റ്‌ വേണം എന്നും പറഞ്ഞു പിന്നാലെ കൂടിയതാണ്.അതിപ്പോ ഇങ്ങനെയായി.ഇതിലെ വന്നതിനു നന്ദി

smitha adharsh said...

കുമാരന്‍ : എന്നെ ഇങ്ങനെ പുകഴ്ത്തരുത്‌ പ്ലീസ്....ജീവിച്ചു പൊക്കോട്ടെ

രസികന്‍ :പറഞ്ഞതെല്ലാം അക്ഷരം പ്രതി ശരിയാണ് കേട്ടോ....എപ്പോഴും,അധ്വാനത്തിന്റെയും, പ്രതിഫലതിന്റെയും വില നന്നായി അറിയാം..എങ്കിലും,തല്‍കാലം ജോലിക്ക് പോകാന്‍ നിവൃത്തിയില്ലാത്ത അവസ്ഥയിലാണ്.കമന്റ് നു നന്ദി

Kichu & Chinnu | കിച്ചു & ചിന്നു :കമന്റ് ശരിക്കും രസിച്ചു..മോള്‍ വേഗം വലുതായീട്ട്, ജോലിക്ക് പോയിട്ട്, ഒരു പാട് കാശ് കിട്ടീട്ട്, ബാങ്ക് ബാലന്‍സൊക്കെ കൂട്ടീട്ട്, ഓഫീസില്‍ പോകാന്‍ കാറൊക്കെ മേടിച്ചിട്ട്, ......
അങങനെ ഒക്കെ വരുമ്പോഴുമിതുപോലെ ഇടക്കൊക്കെ പോസ്റ്റാന്‍ മറക്കരുതേ :)
ഹി..ഹി..ഹി..
പോസ്ടാം..പോസ്ടാം..

ശ്രീ : ശ്രീടെ നാവു പൊന്നായിരിക്കട്ടെ.അപ്പൊ,ഒമ്പതെണ്ണം കിട്ടുമല്ലോ അല്ലെ?

smitha adharsh said...

അരുണ്‍ രാജ : ഇതൊരു കുഞ്ഞു കാര്യം തന്നെയാണ് കേട്ടോ.ഇതു വഴി വന്നു കമന്റ് ഇട്ടതിനു നന്ദി..

മുല്ലപൂവ് : നന്ദി

ഒറ്റയാന്‍ : കമന്റ് നു നന്ദി

ഗൌരിനാഥന്‍ : ജോലി ചെയ്തില്ലെന്കില്‍ ജീവിക്കാന്‍ പറ്റാതവരുടെ അവസ്ഥ കഷ്ടം ആണ് ട്ടോ..എനിക്കും,ജോലി ചെയ്തു ജീവിക്കണം എന്ന് തന്നെയാണ്.പക്ഷെ,ഇപ്പോള്‍ മോളെ നോക്കുന്നതും ഒരു ഉത്തരവാദിത്തം അല്ലെ മാഷേ?
കമന്റ് നു നന്ദി കേട്ടോ

നിരക്ഷരൻ said...

ആ ചക്കപ്പോത്ത് വിളി എനിക്കിഷ്ടായി. പൊണ്ടാട്ടിക്ക് ഇഷ്ടായോന്ന് അറിയാന്‍ നാളെ മുതല്‍ വിളിച്ച് നോക്കണം. നിരക്ഷരന്‍ എന്ന ഒരു ബ്ലോഗറുടെ പോസ്റ്റുകളൊന്നും നാളെ മുതല്‍ കണ്ടില്ലെങ്കില്‍ ....ശേഷം ചിന്ത്യം.... :)

...പാപ്പരാസി... said...

കലക്കി ചേച്ചീ.....

ഇരട്ടി മധുരം.. said...

വളരെ നന്നായിട്ടുണ്ട്. ഗള്‍ഫിലെ ജീവിത(ഇതോ ജീവിതം!)പശ്ചാത്തലത്തില്‍..

മച്ചുനന്‍/കണ്ണന്‍ said...

ടീച്ചറേ..
May I come in..?
രാവിലെ കറന്റ് ബില്ലടക്കാന്‍ പോയി അതാ വൈകിയത്..
സമ്മതിച്ചു ടീച്ചറേ സമ്മതിച്ചു..
അല്ലേലും ഞങ്ങള്‍ തൃശൂര്‍ക്കാര്‍ പണ്ടേ പുലികളാ..

rainysno said...

nannaaayi..........
very good
:)

rosalba said...

മുൻ കാമുകനെ തിരികെ കൊണ്ടുവരാനും വിവാഹം സംരക്ഷിക്കാനും സഹായിക്കുന്നതിന് യഥാർത്ഥ അടിയന്തിര ഫലപ്രദമായ സ്പെൽ കാസ്റ്റർ
എല്ലാവർക്കും ഹലോ, എന്റെ പേര് റോസൽബ, Dr.GURU-ന് നന്ദി. കുറച്ച് വർഷങ്ങൾക്ക് മുമ്പ് എന്റെ ഭർത്താവ് എന്നെ മറ്റൊരു സ്ത്രീക്ക് വിട്ടുകൊടുത്തു, ഞാൻ അവനോട് ഒരു തെറ്റും ചെയ്തിട്ടില്ലാത്തതിനാൽ ഞാൻ വളരെ തകർന്നു, എന്റെ രണ്ട് കുട്ടികളും കുറച്ച് ശമ്പളമുള്ള ജോലിയും എനിക്ക് ബാക്കിയായി. Dr.GURU ഒരു പാട് ആളുകളെ എങ്ങനെ സഹായിച്ചിട്ടുണ്ട് എന്നതിനെക്കുറിച്ചുള്ള ഒരു സാക്ഷ്യം ഓൺലൈനിൽ കാണുന്നത് വരെ ഞാൻ ഏതാണ്ട് ഉപേക്ഷിക്കുകയായിരുന്നു, അതിനാൽ ഡോക്ടർ എന്നോട് ആവശ്യപ്പെട്ടത് ചെയ്ത് 24 മണിക്കൂറിന് ശേഷം ഞാൻ അദ്ദേഹത്തെ ബന്ധപ്പെട്ടു, മന്ത്രവാദത്തിന്റെ പിറ്റേന്ന് എന്റെ ഭർത്താവ് മടങ്ങിവന്നു. ഞാൻ അവനോട് ക്ഷമിക്കുകയും ഒരിക്കലും പോകില്ലെന്ന് വാഗ്ദാനം ചെയ്യുകയും ചെയ്തു. എന്റെ ഭർത്താവ് തിരിച്ചെത്തി ഇപ്പോൾ 6 മാസമായി, ഞങ്ങൾക്ക് ഒരിക്കലും പ്രശ്‌നങ്ങളൊന്നും ഉണ്ടായിട്ടില്ല, എനിക്ക് Dr.GURU വിനെ സംശയിച്ചില്ല എന്നതിൽ സന്തോഷമുണ്ട്. വേഗത്തിലുള്ള ആശ്വാസം കൊണ്ട് ഏത് പ്രശ്‌നങ്ങളും പരിഹരിക്കാൻ അദ്ദേഹത്തിന് കഴിയുമെന്ന് ഇപ്പോൾ എനിക്ക് ഉറപ്പുണ്ട്. സഹായത്തിനായി നിങ്ങൾക്ക് ഇപ്പോൾ അദ്ദേഹവുമായി ബന്ധപ്പെടാം.
ഇമെയിൽ: saguruu087@gmail.com